Yumi stadi long buk ya Mak - 2

King ya we God i promes, hem nao i kam
Mak 1:2-15

2.1 Promes we i stap long Ol Testamen
Mak 1:2-3

Afta long fasfala ves, Mak i talemaot wantaem se samting ya i kamtru stret olsem we oli bin talem long Ol Testeman. Mak 1:2 i kamaot long Malakae 3:1 mo Mak 1:3 i kamaot long Aesea 40:3. Nao, yumi mas luklukgud long Ol Testeman blong kasemgud mining blong ol samting ya.

Ridim Malakae 3:1-5

?Wanem nao bambae i kamtru?

Ridim Aesea 40:1-5, 9-11

?Wanem nao bambae i kamtru?

Yumi save samaraesem ol ves ya olsemia:

"Bambae wan man i kam mo wok blong hem i blong mekemrere rod blong Masta i kam" (Mal 3:1; Aes 40:3-4).

Biaen, bambae Masta i kam. Masta ya, hem i God hem wan (Aes 40:9-10). Bambae hem i go long ol man blong hem, mo long Tabu haos blong hem (Mal 3:1) Mo wok blong hem i blong jajem olgeta (3:3), fofogivim olgeta (Aes 40:1-2), blong sevem olgeta, mo blong rul ova long olgeta, olsem wan King (Aes 40:9-10).

Nao Mak i talem ol samting ya blong givhan long yumi blong yumi save huia man ya Jon, mo huia man ya Jisas.


2.2 Man blong mekemrere rod, hem nao i kam
Mak 1:4-8

Nao ves fo i stat olsemia:

"Nao, biaen, Jon i kamtru long draeples…" (Mak 1:4)

Jon i kam. Hemia nao man blong mekemrere rod blong Masta.

Ridim Mak 1:4-8.

?Jon i mekemrere rod blong Masta olsem wanem?

Ridim Mak 1:4-8.

?Jon i talemaot wanem long saed blong man ya we bambae i kam?

Jon hem i stap singaotem ol man Isrel blong oli tanem tingting blong olgeta. Hem i stap mekemrere olgeta blong olgeta oli tekem man ya we bambae i kam. Hem i talem se man ya i hae moa bitim hem, mo bambae hem i baptaesem olgeta long Tabu Spirit. Tok ya ‘baptaes’ hem i minim se ‘wasem’. Hem i promes se man ya bambae hem i wasem olgeta long Tabu Spirit. Bambae olgeta oli klin.

Yu ridim 2 King 1:7-8 mo skelem wetem Mak 1:6. Yumi luk se Jon i olsem profet Elaeja. (?Huia man ya Elaeja? Traem luk long 1 King 17-21). Nao hem i impoten tumas. Long Malakae 4:5-6 i talem se bambae profet Elaeja i kamtru bakegen mo biaen, bigfala dei blong God bambae i kamtru. Nao, ves ya i givhan long yumi blong luksave se Jon hem i Elaeja ya we bambae hem i kambak samtaem. Bae yumi no tingting strong long samting ya naoia, be hem i wan samting blong putum i stap long tingting blong yu, mo bambae yumi jes lukluk long hem bakegen.

From ol samting ya, taem yumi luk se Jon i kam, mo yumi luksave se hem i man ya blong mekemrere rod blong Masta, ?Wanem nao yumi tingting se bambae i kamtru biaen?


2.3 Masta i kam
Mak 1:9-13

Nao wantaem nomo, Mak i talem se,

"Nao long taem ya, Jisas […], i kam…" (Mak 1:9)

Jisas hem i jes kam biaen long man ya we hem i mekemrere rod blong Masta i kam.

?From samting ya, huia, man ya, Jisas?

Nao Jon i baptaesem Jisas, mo hem i luk Tabu Spirit i kamdaon long hem olsem wan sotleg, mo oli harem Papa God i talem se,

Yu yu pikinini blong mi we mi lavem yu tumas. Mi mi glad tumas long yu. (Mak 1:11)

Nao ol tok ya God i talemaot finis long Ol Testeman, mo bakegen, tok ya blong Ol Testeman i givhan long yumi blong yumi save se huia man ya Jisas, mo wanem nao wok blong hem.

‘Yu yu pikinini blong mi’ i kamaot long Ol Sam 2:7. Long ples ya God i stap tok long wan man we bambae hem i putumap i kam King. Mo, long King ya hem i talem se, yu yu pikinini blong mi.

‘Mi Mi glad tumas long yu’ i kamaot long Aesea 42:1 we God i tok long wan man blong wok blong hem. Mo Aesea i talem se wok blong man ya i blong tekem ol man Isrel, oli kambak oli wan bakegen mo blong sevem ol man long wol (49:1-7) mo bambae Hae God i putum ol sin blong yumi evriwan i go long hem mo ded blong hem i wan sakrefaes blong tekemaot ol sin blong ol man (53:6, 10).

From ol samting ya, huia man ya, Jisas?

Nao, afta we Jon i baptaesem Jisas, wantaem nomo Spirit ya i lidim Jisas i go long draeples mo Setan i kam i traem hem blong mekem hem i foldaon. Setan i no wantem se Jisas i mekem wok blong hem. Setan i traem Jisas blong mekem hem i foldaon, i no mekem wok blong hem. Be Jisas i winim Setan. Hemia wan narafala stamba tingting we i kamtru long buk ya we Mak i raetem.


2.4 Masta i statem wok blong hem
Mak 1:14-15

Ale, wok blong Jon i finis, Jisas i statem wok blong hem. Hem i talem se,

“Taem blong hem i stret nao. Taem blong God i kam King blong olgeta man long wol i kam klosap finis. Yufala i mas tanem tingting blong yufala, yufala i mas bilif long gud nius ya.” (Mak 1:15)

Ale yu tingbaot tok ya blong Jisas.

?Taem blong wanem i stret nao?

?Huia man ya, Jisas?

?Yu yu bilif long gud nius ya?

?Olsem wanem? ?Long laef blong yu Jisas i King?